AMC Ward No. VI by-election a MNF leh INC common candidate tur Corporator John Zosangliana (L) nupui Lalrinfeli

by News Editor

Tualchhung News

ZORAM TODAY| 5th August, 2024 (Mon): Aizawl Municipal Corporation (AMC) hnuaia Ward No. VI by-election chu August ni 22, 2024 hian neih a ni dawn a, zing dar 7 leh tlai dar 4 inkar ah vote thlak a ni ang. MNF leh Congress party chuan a hrana candidate siam lovin candidate inṭawm atan zanin dar 8:00 khan Lalrinfeli (Mafeli) an puang. Candidate puanna leh Campaign kickoff hun hi Indoor Stadium, Chanmari West ah an nei.

AMC Ward No. VI hi MNF Corporator John Zosangliana bial niin, kumin march ni 21 khan an chhungkuaa an fate zirna admission buaipuia an zinna Delhi ah heart attack avangin a boral thut a, a bial a ruah tak avangin by-election neih a ni dawn ta a ni.

ZPM chuan official candidate atan H. Zoremtluanga, Chanmari West an lo puang tawh a.

Opposition party pahnih- MNF leh Congress chuan candidate hran siam lovin, common candidate atan Lalrinfeli an puang a, amah hi by-election neihna tur AMC Ward No. VI-a MNF Corporator boral ta, John Zosangliana nupui niin, Chanmari West ah a fanu pahnihte nen an cheng mek.

Ward No. VI hian veng pathum- Chanmari West, Edenthar leh Hunthar a huam mek a, Aizawl North 3 Assembly constituency chhunga awm a ni.

August ni 1, 2024 khan Mark Lalthanliana, by-election neih tura Municipal Returning Officer, Aizawl Municipal Corporation chuan inthlan hriattirna a chhuah.

Inthlanna atan hian nomination paper chu candidate emaw a proposer te’n Municipal Returning officer hnenah August 8, 2024 dar 3:00 PM thleng, dar 11:00 A.M. leh 3:00 P.M. chhungin a thehluh theih a, nomination paper a lak theih tawh a ni.

Nomination paper hi August ni 9, 2024 chawhnu dar 1:00 atanga dar 3:00 PM chhungin Addl. Deputy Commissioner office, Aizawl ah endik a ni ang.

Candidate in hnukdawk duh chuan an in hnuhdawhna chu anmahni ngeiin emaw, an proposer emaw, an election agent te’n candidate in a authorise na lehkha ziak nen 12.08.2024 chawhnu dar 1 PM rik hma in thehluh tur a nih thu tarlan a ni.

(Pic: John Zosangliana (L) leh a nupui Lalrinfeli)